Estudante 90 Resin Turma ida, NKS Persiza Sala de Aula

ERMERA, 16 marsu 2024 (TATOLI) – Diretór Eskola Ensinu Sekundária Jerál Nino Konis Santana (NKS) Gleno-Ermera, Gaspar dos Santos relata katak NKS menus fasilidade liu-liu sala de aula hodi garante kualidade aprendizajen.

“NKS nia estudante agora hamutuk 2,750, maibe ita iha deit sala de aula 17. Husi sala hirak ne’e, sala ne’en (6) mak ho kondisaun diak, sala sia (9) ho kondisaun normal no sala rua (2) ho kondisaun grave tebes,” Diretór NKS ba Jornalista Tatoli, iha nia kanaar fatin, Gleno Ermera.

Nia dehan ho numeru estudante ne’ebé aas obriga alunu entre 80 to 90 resin tama iha sala ida: “Tuir kriteira Ministériu Edukasaun, sala ida tenke akumula deit estudante nain 45. Maibé ita nia kondisaun mak la permite.”

Hodi rezolve problema refere, inan aman husi estudante foti inisiativa fó kontribuisaun $2.50 kada fulan hodi sosa kadeira no meza  atu aumenta ba sala de aula hodi fasilita prosesu aprendizajen.

“Osan kontribuisaun inan aman nian mak ita aloka ba sosa kadeira masa mean hodi tau tan iha sala de aula para bele akumula estudante barak,” tenik Diretór Gaspar.

Nia hato’o katak, bainhira iha ezame nasioanal, tuir kriteira Minsitériu Edukasaun, sala de aula ida tenke akumula deit estudante nain 20. Maibé, ho situasan NKS nian, sala ida tenke fahe ba rua hodi akumula estudante 40: “Ida ne’e mos seidauk to’o tanba ami sei uza tan sala ne’en (6) ou hitu (7) husi Ensino Báziku 10 de Abril atu nune’e estudante hotu bele asesu ba fatin di’ak hodi tuir ezame nasional.”

Diretór ne’e akresenta NKS mos sei menus profesor: “Tanba ne’e mak NKS kontrata tan profesor parsial nain 30 hodi fasilita prosesu aprendizajen.”

“Ita iha deit profesor permanente hamutuk 39. Profesor permanente sira mesak labele kobre hotu matéria 17. Tanba ne’e mak ita iha profesor parsial sira. Salariu ba profesor parsial sira mai husi kontribuisaun inan aman $2.50 kada estudante,” Gaspar esplika. 

Nia subliña katak maske ho situasaun refere, NKS tau nafatin esforsu atu garante kualidade aprendizajen ba alunu sira. 

Gaspar husu ba Ministeriu Edukasaun atu loke tan Ensinu Sekundáriu Jerál ida iha Gleno hodi akumula estudante ne’ebé mak barak.

Nia mos husu ba Ministériu Edukasaun atu aumenta tan sala de aula iha NKS: “Lá’os de’it sala de aula, ita mos persiza tan kadeira no meza no husu atu hasae tan númeru profesor hodi asegura kualidade aprendizajen iha NKS.” dehan Gaspar.

Nia informa katak NKS hato’o ona proposta ba Diresaun Edukasaun Munisípiu Ermera hodi rezolve problema menus sala de aula no material escolar seluk: “Iha inisiu 2023, Ministériu Edukasaun distribui kadeira no meza 50 ba NKS, maibé ne’e seidauk too. Governu mos simu ami nia proposa konaba aumenta sala de aula. Entaun, oras ne’e dadaun konstrusaun ba edifisiu foun ho sala tolu atinji ona 25%.”

“NKS iha bibilioteka ida, no sentru formasaun lian ingles ida. Buat ne’ebé sei falta iha NKS mak laiha sala hodi akumula material laboratóriu,” Gaspar konklui.

Iha 2023, estudante na’in 25 mak la pasa iha ezame nasional, ho nune’e, Gaspar kompromete katak sei esforsu makas hodi reduz numeru refere iha ezame nasional 2024: “Ita sei halo di’ak liután atu estudante hotu bele pasa iha ezame nasional tuir mai.”

Jornalista: Afonso do Rosario
Editór: Filomeno Martins

Fonte Notisia : https://tatoli.tl/2024/03/16/estudante-90-resin-turma-ida-nks-persiza-sala-de-aula/