Eskola Nino Konis Santana Gleno kontinua hametin Espiritu Nasionalismu no disiplina ba estudante no professores sira liu husi Içar Bandeira Nasional ne’ebe hala’o regularmente iha inisiu semana nian.Atividade Içar Bandeira ne’e sai nu’udar kultura eskola nian, tamba ne’e Partisipantes husi estudantes, professores no mos estrutura eskola nian.
Seremonia Içar Bandeira ba semana dahaat, loron 22 fulan junho tinan 2026 nian, responsavel husi estudante klase 110 ano Ciência Sociais e Humanidades(CSH) turma E, no inspector ba seremonia ne’e mak professor Alexandre S. Salsinha, L.Ed.
Leopoldino de Deus nu’udar representante estudante husi klase 110 ano Ciência Sociais e Humanidades(CSH) turma E, hodi hato’o nia diskursu badak ho topiku ”Papel Juventude iha dezenvolvimentu Timor-Leste liu husi Edukasaun” katak eskola mak fatin atu forma karakter.
Iha nia diskursu nia hateten katak, hanesan estudante, ita iha responsabilidade atu aprende ho seriedade no prepara an ba futuru. Eskola la’ós deit fatin atu hetan nota di’ak, maibe fatin atu forma ita nia karakter, disciplina no responsabilidade. Tanba ne’e, ita tenke aproveita tempu ne’ebe iha atu estuda no dezenvolve ita nia kapasidade.
Hanesan estudante, husi área Ciências Sociais e Humanidades, ita aprende kona ba história, sociedade, kultura no realidade moris povu nian. Conhecimento sira ne’e, importante atu ajuda ita komprende problema sira iha sociedade no buka solusaun di’ak ba dezenvolvimentu nasaun nian.
Hau hakarak konvida kolega estudante sira hotu, atu hametin espíritu unidade, respeitu no solidariedade. Mai ita evita konflitu, respeita diferença sira no ajuda malu atu kria ambiente aprendizagem ne’ebe mos, seguro no agradável ba ema hotu.
Hau mos hakarak enkoraja kolega sira atu uza tecnologia ho responsabilidade, fó prioridade ba estudu no la haluha ita nia dever hanesan estudante. Futuru Timor-Leste depende ba juventude sira ohin loron.
Ikus mai, hau representa 11.º Ano Turma E, hato’o agradesimentu ba diretora Interina, professores no kolega sira ne’ebe sempre suporta no orienta ita iha dalan educação nian.
Viva Edukasaun!
Viva juventude Timor-Leste!
Viva Timor-Leste!
Leave a Reply