Iha era dijital ne’ebe la’o lais tebes hanesan ita hare ohin loron, eskola la’os ona fatin atu lee livru no rona deit ba profesor sira iha klase laran. Eskola presiza sai fatin ida ne’ebe nakloke atu prepara estudante sira ba mundu real. Foin lalais ne’e, foti inisiativa ida husi atividade extrakurikuler ne’ebe hare liu ba abilidade dijital; hahu husi pratika dezenu (desain) uza aplikasaun Canva, oinsa rejista akun Gmail, no formasaun kona ba seguransa internet nian ka Swipe Safe.
Imagen: estudantes NCS partisipa iha formasaun Swipe Safe iha aula (foto doc: Aguida Soares)
Atividade extrakurikuler hanesan nee la’os atu prense tempu livre, maibe ida ne’e nesesidade ida ba futuru foin sa’e sira nian.
Teknolojia agora halo buat hotu sai fasil, se ita halo komparasaun uluk ita dehan dezenu ka design ne’e ba deit ema ne’ebe eskola no kursu iha sentru formasaun sira, maibe tempu agora ho de’it aplikasaun Canva, estudante sira bele desain sertifkidadu, logo, no slide ka aprezentasaun tpc eskola nian, etc.
Extrakurikuler nee fó oportunidade ba estudante sira atu hasa’e sira nia talentu no kreatividade ho abilidade hirak ne’e sei util tebes kuandu estudante sira finaliza ona sira nian Ensino aprendisazen iha eskola Ensino sekundariu sai nudar bukae ida hodi kontinua ba nivel edukasuan ne’ebe as liu tan iha futuru.
Antes atu uza Canva ka aplikasaun seluk, xave primeiru mak tenke iha account ka konta gmail. Iha atividade extrakurikuler ne’e, estudante sira aprende oinsa atu rejista rasik sira nia Gmail no mos atu manda ka send tpc liu husi gmail.
Teknolojia fó benefisiu barak, maibe lori mós risku se ita la matenek atu uza. Tanba nee, formasaun Swipe Safe (Seguransa internet) nudar pasu ne’ebe diak tebes husi eskola.
Iha formasaun ne’e, estudante sira aprende oinsa atu uza internet ho matenek, labele monu ba cyberbullying (violénsia iha mundu dijital), no oinsa proteje sira-nia privasidade hodi la fahe informasaun pesoal ba ema ne’ebe la koñese.
Mundu internet ne’e hanesan dalan boot ida, se ita la hatene ninia regra, ita bele hetan asidente, Swipe Safe fó xave ba estudante sira atu sai sidadaun dijital ne’ebe responsavel.
Konkluzaun
Atividade extrakurikuler ne’ebe kombina kreatividade (Canva), báziku dijital (Gmail), no seguransa internet (Swipe Safe) ne’e merese duni hetan apresiasaun no tenke kontinua halo nafatin. Ho programa hanesan nee, ita la’os deit forma estudante sira ne’ebe matenek deit iha teoria, maibe mos sira preparadu, kreativu, no seguru atu foti parte iha dezenvolvimentu teknolojia mundu nian.
Kada loron nudar oportunidade foun atu sai nudar versaun ne’ebe diak liu husi ita nia an ba futuru ne’ebe diak liu, mai ita apoiu nafatin atividade extrakurikuler ne’ebe lori inovasaun hodi hariku liu tan ita nia abilidade no kuinesementu sira.
Hakerek : Aguida Soares
Revizasaun : Equipa Formador Jornal Parede Dijital (JPD) DNDM-SEKOMS
Leave a Reply